球會資料
外號:兵工廠
成立年份:1886年
主場:阿聯酋航空球場
主席:彼德希爾活特
領隊:雲格
上季排名:第4位
  威水史
英格蘭頂級聯賽:13次
英格蘭足總盃:10次
英格蘭聯賽盃:2次
英格蘭慈善盾/社區盾12次
歐洲盃賽冠軍盃:1次
歐洲足協盃:1次
 
  多年培育 小兵養熟
雲格搶盃靠初生之犢

 
  經歷4年冇獎盃嘅日子後,阿仙奴球迷對球隊打造「青春班」嘅耐性似乎已經用到七七八八,就連德高望重嘅領隊雲格,喺上季季尾都罕見面對大量質疑聲音。無論為面子、為帥位、為再嘗捧盃滋味,雲格新季都要盡地一煲,期望一班「餓盃」多時嘅成熟小兵可以實踐多年美夢!

雲格多年來悉心栽培嘅「青春班」,喺上季嘅艱難環境明顯成熟唔少,眾多傷兵令桑治、丹尼遜、基蘭基比斯同賓特拿等小將有大量磨練機會,無疑加強球隊嘅板櫈深度。上季季尾主力復出後,阿仙奴嘅成績已大有改善,呢班合作多年嘅新人新季幾乎原班人腳再戰,相比其他勁旅嘅大換血,合作性將係一大優勢,只要新人成熟、主力可以健康比賽,「兵工廠」喺被睇死下仍可有一番作為。

踢法機動有利有弊

阿仙奴嘅鋒力喺英超、甚至歐洲都係一流水平,不過防線始終有缺口。阿仙奴嘅踢法需要場上十個球員不停快速奔走,所以中堅都係偏向速度型,面對杜奧巴呢類高大硬淨球員,甚或一啲傳統英式中鋒,中路防守往往成為對手攻擊重點,加上阿仙奴仲未搵到一個一級嘅防守中場嚟保護條防線,解決唔到防守問題,阿仙奴始終都輸蝕。

陣容穩定等待收成

即使有高路托尼及艾迪巴約離隊,阿仙奴一如既往冇喺轉會市場大動作增兵,希望保持陣容嘅穩定性,雲格將所有賭注押喺一班年輕球員嘅成熟進度上,幸好球隊仲有法比加斯、艾沙維同尹佩斯呢啲巨星壓陣,若然新人成熟程度理想,阿仙奴未必如外界想像悲觀。