球會資料
外號:獅子
成立年份:1874年
主場:維拉公園球場
主席:儂拿
領隊:奧尼爾
上季排名:第6位
  威水史
英格蘭頂級聯賽:7次
英格蘭足總盃:7次
英格蘭聯賽盃:5次
英格蘭慈善盾/社區盾1次
 
  雙翼齊飛
進攻多變火力勁

 
  阿士東維拉上季一度打破Big4壟斷,長時間佔據英超前四位置,可惜下半季戰線頻密,功虧一簣未能攞得歐聯資格。不過,佢哋新季唔使好似上季咁辛苦由圖圖盃起步,喺有更多時間休息下,大有機會突破上季成績。

維拉最煞食係兩隻快翼艾邦拉荷及艾舒利楊格,主攻時可以拉闊進攻層面,穩守時則可作為突擊武器,配合高大中鋒卡維及希斯基,進攻極具效率。此外,兩人經過上季磨練已進步不少,艾邦拉荷把握力愈見成熟,聯賽射入12球成球隊首席射手。至於艾舒利楊格就搖身變成罰球王,長、短傳餵波愈見功架。

不走不走還須走,前隊長巴利終於結束維拉十二年生涯轉投曼城,缺少咗呢位中場大腦兼領袖,維拉組織力肯定有所減弱。因領隊奧尼爾仍未找到巴利嘅代替品,若然單靠柏杜夫及李奧曲卡等中場悍將,的確頗令人擔心,相信奧尼爾要積極啲搵番個指揮官返嚟。

成敗看中場補給

維拉上季表現大躍進,差啲踢走阿仙奴成為新Big4,預期今季會非常惡踢,皆因各路英雄已經有晒防範。再者,巴利離隊究竟影響有幾深遠,亦係一個問號,若然維拉開季前仍未能補充中場人選,相信要打入前四仍有難度,不過維拉表現愈見成熟卻係不爭事實,相信保住前六問題不大。