球會資料
外號:藍戰士、車仔
成立年份:1905年
主場:史丹福橋球場
主席:布克
領隊:安察洛堤
上季排名:第3位
  威水史
英格蘭頂級聯賽:3次
英格蘭足總盃:5次
英格蘭聯賽盃:4次
英格蘭慈善盾/社區盾:3次
歐洲盃賽冠軍盃:2次
歐洲超級盃:1次
 
  海嘯沒頂 阿布制水
安察洛堤搭錯車冇作為

 
  車路士上季僅得聯賽第三,係阿布入主以來成績最差嘅一年。以往車仔財大氣粗,想要乜人就有乜人,真係可以話呼風喚雨,但金融海嘯後,阿布身家大縮水,依家車仔買乜人都要諗過度過先。講錢,車路士冇曼城咁豪,講氣勢,又冇曼聯咁強,講歸屬感,又冇紅軍咁一條心。新季仲要搵一個全冇英超執教經驗嘅安察洛堤空降落嚟,車仔想喺曼聯手上攞番聯賽冠軍,真係難過登天。

車仔近年嘅班底相當固定,由施治、泰利、林柏特、波歷克、艾辛及杜奧巴組成嘅主力陣容,已合作多年。新季車路士陣容並冇太大變動,球員建立良好默契,係車仔嘅最大優點。車仔另一優點係主場成績穩定,雖然上季畀史高拉利打爛齋缽,保持多年嘅八十六場聯賽主場不敗紀錄告終,但對手要喺史丹福橋球場搶分絕非易事,呢點係車仔唯一最大優勢。

安帥不穩 影響軍心

自阿布拉莫域入主後,安察洛堤已係車路士六年來第六位領隊。安察洛堤經驗豐富,而且係歐聯冠軍教頭,但從未教過英超,而且英文亦麻麻,能否適應英超文化,係好多車仔球迷嘅疑問。事實上,上季史高拉利僅教咗半季就被炒,證明阿布嘅耐性有限,如果球員唔能夠喺短期內適應新戰術,安察洛堤隨時係咁先,到時車仔又要搵新領隊,想有好成績睇怕都好難!

主力老化 唔再當打

車路士新季實在太多不明朗因素,新領隊安察洛堤初來甫到,究竟會否步上季「大菲」史高拉利嘅後塵,真係冇人答到。而主力球員之中,林柏特、安歷卡、波歷克及杜奧巴已經「三張嘢」,正所謂拳怕少壯,對住當打嘅曼聯,又或者阿仙奴班少年槍手,車仔班老將真係唔知頂唔頂得住。