球會資料
外號:拖肥糖
成立年份:1878年
主場:葛迪遜公園球場
主席:簡胡禮
領隊:莫耶斯
上季排名:第5位
  威水史
英格蘭頂級聯賽:9次
英格蘭足總盃:5次
英格蘭慈善盾/社區盾:9次
歐洲盃賽冠軍盃:1次
 
  停滯不前主攻盃賽仲實際

 
  愛華頓雖然喺04/05球季力壓利物浦取得第四,成為自03年以來,唯一能夠打破Big4壟斷前四嘅球隊,但近年未能再進一步,新季更多咗曼城加入戰團,都係爭盃賽冠軍機會更大。

應贏則贏少甩拖

愛華頓中場卡希爾、奧士文、派拿等全部都係拚命三郎,上季尾殺入足總盃決賽後,聯賽最尾四場仍然取得三勝一和,夠晒搏命。「拖肥糖」近年面對同級或次級對手甚少甩拖,喺上季38場比賽當中,只有6場波輸畀Big4以外嘅對手,算得上係比上不足,比下有餘。

對住強隊難偷雞

計埋盃賽,愛華頓上季12次對Big4雖然僅輸4仗,戰績較往季有明顯改善,但卻一場都贏唔到。此外,近年亦受季初傷病困擾,上季頭12場比賽僅勝兩仗。再講,陣中尼日利亞三寶耶古保、安尼捷比及尤保極有可能被徵召,出戰下年初嘅非洲國家盃決賽周,屆時戰績亦有可能受影響。

戰術呆板欠突破

除非Big4其中一隊演出極度走樣,否則,愛華頓仍然難望挑戰前四,加上財力不及同級對手曼城及熱刺,同時間又要兼顧歐霸盃,相信位置有可能下調,未必能夠連續第三季取得第五。而且,愛華頓領隊莫耶斯治軍風格始終較為保守,無論陣容同戰術、調兵遣將方面近年都變化唔大,只係一貫嘅穩守突擊踢法,四平八穩難有進步。