球會資料
外號:紅軍
成立年份:1892年
主場:晏菲路球場
主席:吉列、希斯
領隊:賓尼迪斯
上季排名:第2位
  威水史
英格蘭頂級聯賽:18次
英格蘭足總盃:7次
英格蘭聯賽盃:7次
英格蘭慈善盾/社區盾:15次
歐洲冠軍球會盃/歐洲聯賽冠軍盃:5次
歐洲足協盃:3次
歐洲超級盃:3次
 
  趕走麻煩友重握大權
賓尼迪斯開心驅魔

 
  雖然去季四大皆空,但利物浦終能抬起頭做人,因為紅軍喺聯賽力逼曼聯到最後,證明自己並非「盃賽專家」咁簡單,而係真正有能力爭逐聯賽錦標!球隊有隊形、戰將有信心、賓帥又重獲話事權,目前利物浦萬事俱備,只欠東風,新季可以繼續狙擊紅魔鬼!

紅軍正選十一人,戰鬥力同「Big3」相比毫不輸蝕,過往大打「海鮮波」,只因球員唔夠信心,鬥勁旅經常未打先輸。去季紅軍進步良多,與「Big3」兩循環聯賽六次較量四勝二和,大大增強球員自信,只要新季謝拉特同費蘭度托利斯傷少啲,鬥弱旅減少和波,踢番上季季尾遇神殺神嘅表現,可以繼續同曼聯死過。而CEO佩利走人,賓尼迪斯重握買人、點兵大權,同兩位美國老細又言歸於好,紅軍搞掂內部問題,可一致對付外敵。

板櫈力弱靠「謝托」

講到缺點,利物浦冇曼聯同車仔咁有錢,所以後備力量始終唔夠。盧卡斯、尼高治、艾沙亞等唔夠班,落到場經常交唔到貨,旨意佢哋改變戰局盞嘥氣。雖然上季季尾古積特、班拿約有神來之筆,但如果佢哋打回原形,又係要靠「謝托配」救亡,紅軍又唔見大把冤枉分,對弱隊能否減少失分係紅軍今季爭霸關鍵。

成熟當打有霸氣

利物浦一班主力成熟當打,謝拉特、費蘭度托利斯實力超班,而去季嘅爭霸寶貴經驗,強化咗球隊心理質素,由贏變和、和變輸嘅比賽將大大減少。若紅軍新季歐聯早啲出局,球隊以全力爭奪聯賽錦標,力足同曼聯拗手瓜。