球會資料
外號:紅魔鬼
成立年份:1878
主場:奧脫福球場
老細:格拉沙
領隊:費格遜
上季排名:1
  威水史
英格蘭頂級聯賽:18
英格蘭足總盃:11次
英格蘭聯賽盃:3次
歐洲冠軍球會盃 / 歐洲聯賽冠軍盃:3次
歐洲盃賽冠軍盃:1次
歐洲超級盃冠軍:1次
世界冠軍球會盃:1次
 
  見慣風浪 冇C朗未驚過
費Sir淡定擺擂台

 
  走的終需走,「後C朗時代」終於來臨!C朗一去,唔少曼迷擔心球隊唔掂,不過,教頭費爵爺行走江湖多年,有乜風浪未見過吖!王牌球星離開後,曼聯無可避免要全面調整進攻系統,奧雲、路爾斯華倫西亞及奧巴坦來投,仲有朗尼、貝碧托夫等球星撐場,邊個夠膽睇死佢哋?上季曼聯追平利物浦十八奪頂級聯賽冠軍紀錄,新季矢志力爭第十九次頂級聯賽冠軍,擺定擂台等列強挑戰!

上季曼聯挑戰史無前例五冠王紀錄,雖然功敗垂成,但大軍全季參戰超過六十場賽事,當中不乏大戰。經過連場激戰後,隊中年輕球員經驗大增,其中費查、卡域克及朗尼等中前場球員經歷磨練,演出愈來愈成熟,新季已有能力擔大旗!再者,老將雲達沙、史高斯及傑斯等仍在陣,經驗夠晒,加上馬捷達及韋碧克等後浪衝擊,隊內競爭仍然極大,大軍陣容非常龐大,板櫈深度夠,絕對唔怕三、四線作戰!

級數仍在 變陣就掂

理論上一個球員不足以影響成支球隊,但過去兩季C朗為「紅魔鬼」貢獻四十九個聯賽入球,屬球隊王牌「士哥拿」,朗尼同貝碧托夫並非高產射手,唔可以靠晒佢哋!所以費格遜兵行險着,從紐卡素簽入前國腳奧雲,希望憑佢喺禁區嘅埋門觸覺同經驗,保持球隊入球率。經歷球員變動後,季前球會重新執過戰術,新舊球員亦要再磨合,「紅魔鬼」級數雖然毋須懷疑,獨忌其季初變動大,未必可以即時發揮水準,一旦畀人放甩就大劑嘞!

兵源充足 強弱照殺

上季聯賽收咧戰,費Sir派曼聯三隊踢風流波照贏侯城,足見大軍同其他英超球隊實力差距有幾大。英超各軍瘋狂增兵,賽事水平不斷提高,「紅魔鬼」衞冕一年比一年困難,但大軍勝在有霸氣,遇上次級對手好少甩拖,呢點絕對屬爭標關鍵。步入「後C朗時代」,「紅魔鬼」估計亦可穩入前三,如果順風順水,甚至可一圓英超四連冠美夢添!